Душанба, 18 Ноябрь 2019

Ноқонуний дори воситалари фош этилди

Яшил йўлак орқали 85 миллион сўмлик дори воситаларини ноқонуний олиб киришга уринган шахслар фош этилди. Тошкент халқаро аэропорти божхоначилари кўп миқдордаги дори воситалари ва тиббий буюмларининг мамлакатимизга ноқонуний олиб кирилишининг олдини олишди.

“Москва-Тошкент” рейси бўйича парвозини якунлаган фуқаро З.Б. божхона чегарасидан яшил йўлак орқали ўтаётиб, ёнида тақиқланган ёки ортиқча юклари йўқлигини маълум қилади. Бироқ божхона ходимларида шубҳа уйғотгани сабабли унинг юклари белгиланган тартибда божхона кўригидан ўтказилди ва унинг қилмишлари фош бўлди.

Маълум бўлишича, З.Б. юклар орасида божхона назоратига тақдим қилинмаган ва божхона ходимининг оғзаки сўрови пайтида айтилмаган, умумий нархи дастлабки суриштирувларга кўра 60 миллион сўмлик 14 турдаги 409 дона стоматологик тиббий буюмни олиб киришга уринган экан.

Худди шу рейс билан учиб келган яна бир йўловчи — фуқаро А.Ж.га ҳам божхона чегарасидан яшил йўлак орқали 29 турдаги 113 дона дори воситалари ва тиббиёт буюмларини олиб ўтиш насиб қилмади. Ушбу шахс қиймати 25 миллион сўмлик ушбу товарлар ҳақида йўловчи божхона декларациясида ҳам, божхона ходимларининг оғзаки сўрови пайтида ҳам маълум қилмай туриб, олиб кирмоқчи бўлган пайтда тўхтатиб қолинди.

Ҳозир ушбу ҳолатлар юзасидан божхона текширувлари ва суриштирув ҳаракатлари давом эттирилмоқда.

Давлат божхона қўмитаси Ахборот хизмати.